Jonas Benyuoub trer til side og gir hovudrolla i suksessframsyninga Da vi var yngre vidare til skodespelar Serhat Yildirim.
Rappar og artist Jonas Benyoub debuterte som skodespelar med rolla som Ivor til strålande kritikkar, og blei i vår nominert til Heddaprisen for Beste skodespelar. Men etter 40 framsyningar av knallsuksessen Da vi var yngre, takkar han for seg og dreg vidare på nye eventyr. Over nyttår tek Serhat Yildirim - kjent frå mellom anna NRK3-serien 16-19, filmen Alle utlendinger har lukka gardiner og reality-programma Forræder og Kokkeskolen - inn i hovurdrolla som Ivor. I haust har han vore på turne landet rundt med Riksteatret/Det Norske Teatret-produksjonen Ord for blod.
Suksessframsyning
Teaterversjonen av Oliver Lovrenskis debutroman Da vi var yngre blei ein favoritt både hos publikum og hos kritikarane. «En brutalt god forestilling» skreiv Aftenposten og trilla 6 på terningen. Regissør Aksel Hennie, Benyoub og resten av gjengen bak framsyninga stakk av med Heddaprisen for Beste teaterframsyning for ungdom. Da vi var yngre har vore utselt sidan premieren, trass i at framsyninga blei flytt frå Scene 2 til Hovudscenen.
Rå oppvekstskildring
Oliver Lovrenski brakdebuterte med romanen Da vi var yngre berre 19 år gamal i 2023. Boka blei nominert til Brageprisen og vann Bokhandlarprisen. Handlinga går føre seg på Grønland i Oslo, der vi følger hovudpersonen Ivor (Serhat Yildirim) sitt ungdomsliv med vennskap, jenter, sorg, rus og eit tilvere som spinn ut av kontroll. Forteljinga gir eit sjeldan innblikk inn i eit røft miljø, og ei intens og rå oppvekstskildring, fortalt med varme og humor.